Паважаныя сябры! Наша ўстанова адукацыі прымае ўдзел ва ўсебеларускай акцыi, аб’яўленай Нацыянальнай акадэміяй навук Беларусі «Народны летапіс Вялікай Айчыннай вайны:
успомнім усіх!»
Вялікая Айчынная вайна 1941–1945 гг. пакінула глыбокі след у гісторыі беларускага народа. На акупаванай тэрыторыі Беларусі 3 гады шугала полымя ўсенароднага супраціўлення захопнікам. У змаганні з германскімі агрэсарамі Беларусь страціла кожнага трэцяга жыхара. Беларускі народ свята паважае памяць пра загінуўшых. На тэрыторыі нашай краіны ўзведзена больш за 8,5 тысяч мемарыялаў, помнікаў і рукатворных Курганоў Славы. Велізарная ўвага надаецца захаванню духоўнай памяці. За дзесяцігоддзі, якія прайшлі пасля Вялікай Айчыннай вайны, створаны сотні мастацкіх твораў і кінафільмаў. Айчынныя навукоўцы апублікавалі каля 12 тысяч прац, у тым ліку ўнікальную 146-томную хроніку «Памяць», адзіны на постсавецкай прасторы вучэбна-метадычны комплекс «Великая Отечественная война советского народа (в контексте Второй мировой войны)». Толькі ў апошнія гады выдадзены такія знакавыя для нашага народа і дзяржавы навуковыя працы, як «Вклад белорусского народа в Победу в Великой Отечественной войне» і «Созвездие героев земли белорусской».
Становіцца ўсё менш і менш непасрэдных сведак і ўдзельнікаў ваенных падзей. Нам жыццёва важна захаваць для нашчадкаў кожны факт і дэталь — усё, што стала ўвасабленнем духоўнай моцы беларускага народа ў цяжкія ваенныя гады.
Звяртаемся да ўсіх зацікаўленых грамадзян Рэспублікі Беларусь з просьбай разгарнуць працу па збору ўспамінаў і фатаграфій удзельнікаў падзей Вялікай Айчыннай вайны. Матэрыялы просім накіроўваць у Інстытут гісторыі Нацыянальнай акадэміі навук Беларусі, дзе будзе ажыццяўляцца збор інфармацыі і навуковая апрацоўка атрыманых звестак, падрыхтоўка на іх аснове адпаведных выданняў, а таксама стварэнне электроннай базы дадзеных. Электронны адрас: voenhistbel@mail.ru
